GTF-imut, siulersuisuinilu suleriaatsimut tunngasumik nassuiaat

Grønlands Taekwon-Do Forbund, GIF-ip ataani inissisimasoq, kattuffiuvoq tallimanik siulersuisuni ilaasortalik.

Imaappullu:

Siulittaasoq - Siul. tullia - Allatsi - Aningaaserisoq - Ilaasortaq

Ilaasortat ataasiakkaarlutik immikkut tamarmik suliassaannik allattorsimaffeqarput aamma taaneqartartumik forretningsplan.

1.                      Siulersuisuusut suliassaraat imminut illersorneq, timersoriaaseq aammalu inooriaaseq Taekwon-Do ersarissassallugu, aammattaaq sineriammi timersoqatigiiffiit piumasaat malillugu sulissallutik.

Siulersuisut nalinginnaasumik qaammatip aallartinnerani marlunngorneq siulleq ataatsimiittarput. Imaqarniliarlu ataatsimiinnerup tulliani akuerineqariaraangat ilaasortanut, soqutiginnittunullu nassiussuunneqartarpoq.

Sineriammi timersoqatigiiffiit ilaasortaatitaqarput. Qaanaamiillu Nanortalik tikillugu illoqarfinni tamangajanni ilaasortaatitaqartoqarluni.

2.                      Pissartanngorniunnerit ingerlanneqartarput oktoberip naanerani imaluunniit november-ip aallartilaarnerani, aaqqissuisussallu ukiup aallartinnerani aalajangerneqakkajupput. Anguniagaavorli ataatsimeersuarnermi aalajangerneqartalissasoq, imaappoq unammersuarnissaq ukioq ataaserluinnaq sioqqullugu.

Nalinginnaasumik inuit 100 missaat peqataasarput, unammisartut, aqutsisut, sungiusaasut, siulersuisut aamma nunanut allanut unammisartut sungiusaasui.

3. Greenland National Team tassaavoq nunanut allanut unammisartut, Team Greenlandimit ilaatigut aningaasanik taperneqartartoq. Nunanut allanut assigiinngitsorpassuarnut unammiartortarput soorlu: Europami pissartanngorniunnerit, Nunarsuarmi piss., Amerika piss. Allarpassuillu.

Inussiarnersumik

GTF-imi siulersuisut